Ginmanduan ni Ombudsman Jesus Crispin “Boying” Remulla ang National Bureau of Investigation (NBI) nga imbestigaran ang mga nagapalapta sang mga malain nga impormasyon kaangot sa iya nga ikaayong lawas.
Sang nagligad nga semana, naglagaw ang mga social media posts nga nagasiling nga gindala sa ospital si Remulla, apang ginpanginwala ini sang iya utod kag mismo sang Ombudsman.
Suno kay Remulla, isa ini ka “orchestrated campaign.”
Pahayag sini, wala siya nakahibalo kun ano ang tuyo sini nga mga post, apang posible suno sa iya nga parte ini sang propaganda machine sang pila ka mga partido sa pulitika.
“Pinapaimbestigahan ko yan. kasi we’ve reached the limit of cyberlibel already. Kaya tignan natin kung saan pupunta,” suno sa Ombudsman.
Ginklaro man sini nga wala sang problema sa iya nga ikaayong lawas bangud naga-work out man ini adlaw-adlaw, nagatulog sang temprano, kag nagabugtaw sang aga pa.
“An idle mind is the devil’s workshop. Wala tayong magagawa naghahanap sila ng iistoryahin. I came out of my radio program last Saturday, but Sunday, meron na naman, tuloy na naman. Kaya makikita mo iyong bad faith,” suno sa iya.
Oktubre 2025 sang nagsugod pungko si Remulla bilang Ombudsman.
Nagpaidalom siya anay sa quintuple bypass surgery sang 2023 sang siya pa ang justice secretary. Sang nagligad nga tuig, ginsapubliko sini nga na-diagnose siya nga may leukemia matapos ang surgery, apang naka-recover na siya kasunod sang treatment.#
