Ginhangkat ni Interior Secretary Jonvic Remulla si anay House Speaker Lord Allan Velasco kag ang iya asawa nga magbalik sa Pilipinas kag magpaidalom sa polygraph test ukon lie detector test.
Ini ang kasunod sang alegasyon nga naangot sila sa pagdul-ong sang mga maleta nga may kwarta sa pamilya Duterte.
Suno kay Remulla, indi man admissible ukon indi mahimo nga ebidensya sa korte ang resulta sang lie detector test, apang gusto niya nga magpa-test man ang mag-asawa nga Velasco agud makita kun sin-o ang nagasugid sang kamatuoran.
“But the polygraph is not admissible in court. Still, I dare the Velasco couple to come and take the same polygraph so we can see who is really telling the truth,” suno kay Remulla sa atubang sang media sa Philippine International Convention Center sa Pasay City.
“They are in Niseko, Japan. That’s the information that we have,” dugang sang tiglikom.
Nauna na nga ginkumpirma sang National Bureau of Investigation (NBI) nga nagbiya si Velasco sa Pilipinas pakadto sa Nagoya, Japan sang Agosto 30.
Ang amo nga hangkat ni Remulla ang kasunod sang polygraph test sa NBI sang anay police officer nga si Rodulfo Gracioso Jr.
Si Gracioso amo ang nag-alegar nga nagdul-ong siya sang mga maleta nga may unod nga kwarta sa pila ka miyembro sang pamilya Duterte.
Suno sa affidavit ni Gracioso, nagdul-ong siya sang kwarta sa pila ka batch kay Vice President Sara Duterte, anay Presidente Rodrigo Duterte kag Davao City First District Representative Paolo Duterte sugod sang 2018, kag ginhimo ini sandig sa mandu ni Velasco.
