Nagguwa sa imbestigasyon nga wala sang atake nga natabo sa Senado sang Myerkules sang gab-i, Mayo 13.
Ginpahayag ini ni Department of the Interior and Local Government (DILG) Secretary Jonvic Remulla anum ka adlaw matapos ang lukpanay sa Senado nga nagtuga sang tuman ka daku nga kontrobersiya.
Ang statement ni Remulla nagasuporta sa panindugan sang Malacañang nga wala sang pagpang-atake, kag nagakontra naman sa gina-insister ni Senate President Alan Peter Cayetano nga “under attack” ang Senado sang amo nga tion.
Ginplastar ini ni Remulla sa press briefing kaupod sanday PNP chief Gen. Jose Melencio Nartatez Jr; Justice Secretary Fredderick Vida; kag Palace press officer Claire Castro.
WALA SANG NBI SA SENADO
Suno kay Remulla, wala sang agent ang National Bureau of Investigation (NBI) nga nagtapak sa Senado sang Mayo 13.
Ginklaro sini nga yara lang ang NBI sa premises sang Government Service Insurance System (GSIS) nga tupad lang sang Senado.
Pareho nga nahamtang ang Senado kag ang GSIS building sa sulod sang GSIS complex.
Ginpaathag ni Remulla nga nagpangayo sang assistance si GSIS President kag General Manager Wick Veloso sa NBI agud mas mahugtan ang seguridad sa GSIS premises.
Ini matapos nag-Facebook Live si Sen. Ronald “Bato” dela Rosa kag naghingyo sa iya supporters nga magtipon kag magpatigayon sang prayer vigil sa Senado.
Suno kay Remulla, gin-request ni Veloso ang bulig sang NBI agud nga maproteksyunan ang artworks sa mga pader nga nagabalor sang binilyon ka pesos amo man ang iban pa nga malahalon nga butang sa GSIS pananglitan may matabo nga tensyon sa Senado bangud didto pa si Bato sang amo nga tion.
Gin-request man ni Veloso suno sa iya nga i-secure ang ila pwertahan agud wala sang komosyon nga makasulod sa GSIS building.
Ginpaklaro naman kun ngaa sa NBI nagpangayo sang bulig ang GSIS kag indi sa PNP.
Suno kay Remulla, didto na nga daan naga-gwardiya ang mga pulis sa Senate building, gani ginpakamaayo ni Veloso nga sa NBI maghingyo sang bulig.
MGA HITABO SANG NAG-ABOT NA ANG NBI
29 ka agents sang NBI ang nag-abot sa GSIS premises kag nagpatigayon sang inspeksyon sa outdoor canteen hallway nga pakadto sa Kalayaan garden.
Ginklaro ni Remulla nga naka-uniporme ang NBI, apang wala sang ano man nga tactical gear nga nakit-an man sa footage sa Closed-Circuit Television.
7:02 sang gab-i, nagbiya na ang 27 ka agents, samtang may duha naman nga nabilin nga amo sanday Agent Darwin Francisco kag Antonio de Leon nga pareho nga naka-uniform kag nagbutang sang pulungkuan sa hagdan.
7:44 sang gab-i, ginpatawag naman ni Acting Senate Sergeant-at-Arms Mao Aplasca ang Office of the Sergeant-at-Arms operatives lakip na ang PNP kag Marines.
Ginmanduan sila suno kay Remulla nga mag-“lock and load” ukon ang idiomatic term nga gina-gamit agud ipreparar ang armas para sa pagpalupok.
Pagkatapos suno kay Remulla, nagdiretso si Aplasca sa hallway nga pakadto sa pwertahan kun sa diin naka-poste ang NBI agents.
Sa normal nga sitwasyon suno kay Remulla, kun may ginapaabot na nga kumprontasyon, kuntani gin-clear anay ni General Aplasca ang area agud wala sang may masalabat; apang ang ginhimo sini, ginpasugtan pa sini ang media nga magsunod sa iya.
Sang 7:46 tubtub 7:49 p.m., nakit-an naman ang pag-aso sa CCTV footage nga kadungan na sang kumprontasyon sang NBI agents kag Senate security personnel.
Suno pa kay Remulla, si Aplasca ang una nagpalupok sang tatlo ka beses sa vicinity sang NBI agents, apang indi man direkta sa agents mismo.
Bangud ginpalukpan ang NBI, nagpalupok man ini sang cover fire. Gin-athag ni Remulla nga indi pakadto sa Senado ang coverfire sang NBI.
Ginpakita man ang footage kun sa ginmanduan sang officer-in-charge ang NBI agents nga ‘do not engage, do not engage”.
Sang ulihi, nakit-an ang duha ka NBI agents nga naga-retreat.
Ginpakita man ang isa pa ka anggulo kun sa diin nagapalupok si Aplasca apang wala man sang tawo kag wala man sang nagatiro sa ila.
Suno kay Remulla, kabug-usan nga 44 ka cartridges ang nakit-an kasunod sang insidente.
Buot silingon suno kay Nartatez, may apat ka shooters. Na-identify ang shooters nga amo sanday Charlie Dumlao Montilla kag Joemil Salazar Ledesma sang OSAA amo man ang halin kay Agent Darwin Nicomedes Francisco sang NBI.
Sa PNP investigation, si Aplasca ang una nga nagpalupok paagi sa iya nga warning shot.
Ginklaro naman ni Remulla nga ang lupok halin sa NBI agent amo ang cover fire samtang naga-retreat kag indi warning shots.
Indi pa matumod subong suno kay Remulla kun staged ukon ginhungod ang amo nga insidente.#
