Remulla, naghatag sang ‘options’ kay Jinggoy antes ang posible paggwa sang arrest warrant

Gin-istorya ni Interior Secretary Jonvic Remulla si Senator Jinggoy Estrada kag ginplastar sa iya ang “options” kaangot sa ginalauman nga pagguwa sang arrest warrant halin sa Sandiganbayan.

Ginpahayag ini ni Remulla matapos nag-file na kahapon sang hapon ang Ombudsman sang kaso nga plunder kag graft batok kay Estrada.

Ini ang kaangot sa flood control projects scandal partikular na ang ginaalegar nga illegal budget insertions sa Department of Public Works and Highways (DPWH) amo man ang illicit payouts nga nagadangat sa P573 million.

Suno kay Remulla, na-istorya na niya si Estrada, ginhatagan niya sang options, kag nagsabat si Estrada nga paminsaran niya anay ini.

“[I] talked to him already,” suno sa tiglikom. “I gave him options and he said he will think about it.”

Pahayag pa sang tiglikom, sikreto lang anay kun ano ang options tubtub nga wala pa sang desisyon si Estrada kun batunon niya ini ukon indi.

Una na nga ginpahayag ni Estrada nga gamiton nila ang tanan nga legal nga remedyo kasunod sang kaso nga plunder kag graft.

Ginahanda na sang iya nga legal team ang nagakaigu nga mga tikang agud nga i-kwestyon ang ginakabig sini nga mga iregularidad sa procedures kag ang kapaslawan nga makonsiderar ang mga ebidensya nga pabor kuntani sa iya kaso.

Nauna naman nga ginpahayag kahapon ni Assistant Ombudsman Mico Clavano nga ang kaso kay Estrada nag-ugat sa mekanismo nga naga-involve sang iligal nga budgetary insertions kag project allocations sa DPWH infrastructure portfolio para sa fiscal year 2025.

Nagguwa sa imbestigasyon suno sa Ombudsman nga gin-gamit ang pondo sang gobyerno sa designated infrastructure projects kabaylo sang commission fees ukon kickbacks.#