ILOILO CITY – Magakonsulta si Magdalo Rep. Gary Alejano sa iya partido kaangot sa masunod nga lihok batok kay Presidente Rodrigo Duterte, matapos ginbasura sang Kamara ang impeachment case nga iya ginpasaka batok sa presidente.
Sa interview sang Bombo Radyo Iloilo, ginpahayag sang mamalidha nga apisar iya na ginatun-an ang pagdangop sa International Criminal Court (ICC), igakonsulta anay niya ini sa partido.
Suno kay Alejano, iya ginkakibot ang kadasig sang pagbasura sang House Justice Committee sa impeachment case.
Ginpahayag sang kongresista nga wala niya ginalauman ang kadasig sang pagdispatsa sa iya reklamo bangud ginalauman niya nga pamatud-an sang mga kaalyado ni Duterte ang ginasiling sang mga ini nga hatagan siya sang tiyansa nga magprisinta sang ebidensiya.
Wala pa maglab-ot sa punto suno kay Alejano nga dapat madetermina sang komite kun may probable cause ang reklamo.
Nagdepensa naman ang kongresista kun nga-a indi ang may direkta nga ihibalo sa mga akusasyon batok kay Presidente Duterte ang nagpasaka sang impeachment case kaangay sang self-confessed Davao Death Squad members nga sanday Edgar Matobato kag Arturo Lascanas.
Ginpahayag ni Alejano nga magaserbe nga testigo ang nasambit nga mga personalidad, rason nga siya ang nagpasaka sang impeachment case sa baylo nga sanday Matobato kag Lascanas.