ILOILO CITY – Nadesisyunan na sang House Committee on Justice nga indi na pagpasakaan sang anuman nga kaso si Magdalo partylist Rep. Gary Alejano.
Ini sa pihak sang paandam sang Kamara kahapon nga indi na pagpasakaan sang kaso nga perjury kag ethics complaint si Alejano matapos napaslawan ini nga pamatud-an nga may personal ini nga ihibalo sa reklamo nga nasaad sa iya impeachment complaint batok kay Presidente Rodrigo Duterte.
Sa interview sang Bombo Radyo Iloilo, ginpahayag ni House Deputy Speaker kag Capiz 2nd District Rep. Fredenil Castro nga wala na sang plano ang House Committee on Justice nga kasuhan pa si Alejano kag ginpakamaayo nga patawaron na lang ini.
Suno kay Castro, antes pa man ang hearing sa impeachment complaint, ginhambalan na ini ni Majority Leader kag Ilocos Norte Rep. Rodolfo Fariñas nga maathag nga perjorious ukon wala sang kamatuoran ang mga reklamo ni Alejano batok sa Chief Executive.
Ginpatawad na lang nila si Alejano suno sa kongresista agud maka-focus sa mga importante nga trabaho sa Kamara.
Dugang pa sini, naintyindihan man nila sa mayorya nga wala nakakonsulta sa eksperto si Alejano gani napaslawan ini mga makapakita sang mga mabug-at nga ebidensya nga nagapamatuod sa nagakatabo nga pinatyanay ukon extrajudicial killings (EJK), indi lang sang nagpungko bilang presidente si Duterte kundi sang alkalde pa lang ini sang Davao City; indi pagdeklarar sang ginapahayag P2.2 billion sini nga kwarta sa bangko; mga tago nga manggad kag indi pagdepensa sa teritoryo sang Pilipinas batok sa China.
Nahibaluan nga 42 ka mga miyembro sang komite ang nagboto agud ibasura ang impeachment complaint ni Rep. Alejano.