𝗜𝗟𝗢𝗜𝗟𝗢 𝗖𝗜𝗧𝗬 — Extremely satisfied si Iloilo City Lone District Representative Julienne “Jam-jam” Baronda sa nangin speech ni President Ferdinand Marcos, Jr. sa iya ika-tatlo nga State of the Nation Address (SONA) kapon nga adlaw sa Batasang Pambansa sa Quezon City.
Sa interview sang Bombo Radyo kay Rep. Baronda, iya ginpahayag nga na-eksplekar sang presidente sang klaro kag maathag ang iya nangin accomplishment sa sulod sang duha ka tuig.
Suno kay Baronda, nangin klaro man ang presidente sa paglatag sang iya plano kag mga tinutuyo sa masunod pa nga mga tinuig.
Ginpahayag man sini nga nabatyagan gid ang gugma sang presidente ilabi na nga nalapawan sini ang expectations sang tanan sa iya performance bilang presidente sang pungsod.
Ginpadayaw man ni Baronda ang hayag nga pagpatpat ni Marcos sang pagtaas sang employment rate sa pungsod kag pagnubo sang numero sang mga pigado nga pamilya.
Nahibaluan nga 2.5 million ka mga Pilipino ang nadula sa listahan sang mga pigado sugod sang nagpungko si Marcos.
Gindayaw man sang natungdan ang kapisan ni Marcos bangud apisar sang kadamuon sang problema sang pungsod nga ginapangatubang sini, natigayon niya sa gihapon nga mangin madinalag-on.
