Nagpanawagan si Iloilo City Lone District Rep. Julienne “Jam” Baronda sang madasig nga lihok para tapuson ang ginaalegar sistematiko nga modus nga pagkawti sa AICS cash aid sa syudad.
Suno kay Baronda, ini nga modus ang madugay na nga nagapabudlay sa mga benepisyaryo.
Sa iya nga privilege speech sa plenaryo sang kamara, ginsiling ni Baronda nga ang AICS ang dapat magpabilin nga “safety net” para sa mga pamilya nga yara sa krisis kag indi dapat mangin political tool ukon pangwartahan sang pila ka opisyal.
Suno kay Baronda, base sa testimoniya sang mga residente kag validation sang DSWD, may mga benepisyaryo nga nakabaton sang ₱10,000 apang napilitan nga magbalik sang ₱8,000 tubtob ₱9,000 sa pila ka barangay intermediaries.
Suno sa iya, humalin pa sang Abril 2024 ginapahayag nga nagsugod ang modus kag apektado na ang kapin 2,100 ka benepisyaryo halin sa 16 ka barangay sa Iloilo City.
Agud tapuson ang modus, nagpanawagan si Baronda sang full kag public disclosure sang DSWD agud ipagwa ang bilog nga resulta sang imbestigasyon kag pangalanan ang 17 barangay officials nga ginaimbestigaran.
Suno sa opisyal, dapat nga pasakaan gid sang kaso administratibo kag kriminal ang mga involved nga opisyal.
Ginrekomendar man niya ang post-payout random verification para masiguro nga nahatag sang bilog ang ayuda sa benepisyaryo.
Mas maayo man suno sa iya ang direct disbursement system kaangay sang paggamit sang bank transfer, e-wallets, cash cards, kag accredited financial institutions para malikawan ang “intermediaries.”
Ginmungkahi man sini nga magbulig mismo ang DSWD Crisis Intervention Units kag regional offices agud malikawan ang pamolotika sa pagkuha sang case study sa CSWDO/MSWDO.
Nagpanawagan man si Baronda sa mga Ilonggo nga maghambal kag indi mahadlok nga ibuyagyag ang kamatuoran.
Ginpasiguro man sini nga iduso niya ang reporma agud maprotektahan ang pondo para sa mga pigado kag mabalik ang pagsalig sang pumuluyo sa gobyerno.
