ILOILO CITY – Nagpabutyag sang sentimento si Iloilo City Lone District Rep. Julienne ‘Jamjam’ Baronda kaangot sa pagbansag sa syudad bilang ‘most shabulized city’.
Ang nasambit nga bansag ang ginpahayag sadto ni anay Presidente Rodrigo Duterte sa tunga-tunga sang iya war on drugs.
Isa naman si former Iloilo City Mayor Jed Patrick Mabilog sa mga gintumod ni Duterte nga protector sadto sang iligal nga droga, apang wala man sang mabakod nga ebidensya.
Sa ginpatigayon nga hearing sang Quad Committee sang Kamara, ginpahayag ni Baronda nga isa si Mabilog sa mga wala mahatagan sang hustisya sa tion sang Duterte administration.
Suno kay Baronda, bilang tiglawas sang Iloilo City, luyag sini nga makakas na ang bansag sa syudad bilang ‘most shabulized city’.
Luyag man sini nga magpauli na si Mabilog sa Pilipinas agud madepensahan sini ang iya pangalan batok sa mga akusasyon ni Duterte.
