ILOILO CITY – Nangin emosyonal si Iloilo City Lone District Rep. Julienne ‘Jam Jam’ Baronda kadungan sang Sulong Gugma Iloilo Proclamation Rally.
Suno kay Baronda, nagakasubo ini sa gindangatan sa subong sang filing sang Certificate of Candidacy (COC).
Ini bangud wala natuman ang handom sini nga maka-upod kuntani sa eleksyon si former Iloilo City Mayor Jed Patrick Mabilog nga ginakabig sini bilang suod nga abyan.
Gin-ako man sini nga masami ini nga ginadaog-daog kag ginapakalain.
Apang suno kay Baronda, gintudluan ini sang iya mga ginikanan nga mangin mapainubuson.
Padayon man ini nga magaserbisyo para sa mga pumuluyo sang syudad.
Sa pihak sini, nagpangabay man ang kongresista sang suporta para sa Team Gugma.
Nahibaluan nga ang utod ni Baronda nga si Lady Julie Grace ‘Love-Love’ Baronda ang magapadalagan naman bilang Vice Mayor.
