ILOILO CITY- Nagpautwas si Iloilo City Lone District Rep. Julienne Baronda sa nagakatabo nga pagpangkakas sa iya laragway sa sulod sang barangay halls sa pila ka mga barangay sa syudad kun sa diin ginaislan ini sang laragway ni Executive Assistant Raisa Treñas- Chu.
Kasunod man ini sang reklamo sang mga pumuluyo kun ngaa ginkakas ang laragway sang kongresista apisar nga yara pa ini sa posisyon.
Suno kay Baronda, ini ang nagapakita sang pagkadula sang pagsalig kag pagrespeto sang mga pumuluyo sa institusyon sang gobyerno.
Pahayag niya, dapat mangin modelo sang delicadeza kag “propriety” ang mga public officials.
Dugang niya, base sa layi, ang public office ang isa ka public trust kag indi ini dapat kabigo nga kaharian sang sin-o man nga yara sa pwesto.
Matandaan nga pinakaulihi diri amo nga natabo sa Lopez Jaena Jaro kun sa diin ginkakas ang laragway ni Baronda kag gin-islan sang laragway ni Treñas- Chu.
