ILOILO CITY-Namalibad si Iloilo City Lone District Rep. Julienne Baronda nga pangalanan ang mga kaupdanan sini sa iya grupo samtang nagahilapit na ang filing sang certificate of candidacy.
Sa interview sang Bombo Radyo kay Rep. Baronda, iya ginpahayag nga kompleto naman ang ila grupo apang wala siya sang ginmitlang nga pangalan kun sin-o ang mapadalagan nga mayor ukon vice mayor.
Suno kay Baronda, ginaampuan na lang niya ini tanan sa Mahal nga Diyos.
Dugang niya, mahibaluan na lang ini sa masunod nga semana kun kanday sin-o gid man ang iya kaupdanan sa pulitika.
Ginpat-ud naman sang kongresista nga indi magpadalagan sa pagka-vice mayor ang iya utod nga si anay Councilor Love-love Baronda apang posible ini nga magpapili liwat bilang konsehal.
Natalana ang filing sang certificates of candidacy sa Oktubre 1 tubtob 8.
