ILOILO CITY- Ginpaanggid ni ACT Teachers party-list Rep. France Castro si Vice President Sara Duterte sa isa ka lukos nga nagabuga sang ata kun daw maipit sa sitwasyon.
Kadungan ini sa ginpatigayon nga hearing sang committee on appropriations sang House of Representatives para sa budget sang Office of the Vice President.
Ini matapos nga namalibad ang vice president nga magsabat sa mga pamangkot natuhoy sa paggamit sang iya opisina sang confidential funds (CFs).
Nanindugan si Duterte nga indi siya magsabat agud depensahan ang budget kag ginsiling nga nakapakig-angot na ini sa Commission on Audit natuhoy sa notice of disallowance.
Apang nagapati si Castro nga tuyo lang ni Duterte nga likawan ang mga pamangkot tuhoy sa kun diin niya gin-gasto ang budget.
Suno kay Castro, indi pwede ang amo nga taktika sang vice president bangud budget ang ginaistoryahan kag kinamatarung sang pumuluyo nga mahibaluan kun paano gin-gasto ang P125 million nga kwarta.
Ang pahayag ni Castro’s tuhoy sa lukos ang kasunod man sang pagmensyonar ni Duterte sa conviction ni Castro sa kaso nga child abuse nga naangot sa iya ginaalegar nga pag-rescue sa kabataan nga Lumad sa Talaingod, Davao del Norte.
Bilang sabat, ginpamangkot ni Duterte si Marikina 2nd District Rep. Stella Quimbo nga amo ang senior vice chair sang appropriations panel nga nag-preside sa Office of the Vice President (OVP) budget deliberations — kun nga ginapanugutan sini ang mga mamalidha nga maghimo sang side comments batok sa iya apang ginapunggan naman siya nga magbuya sang statements tuhoy sa conviction ni Castro.
Sang ulihi, mayorya sang members sang panel ang nagboto pabor sa mosyon halin kay Gabriela party-list Rep. Arlene Brosas nga kakson sa record ang statements tuhoy sa conviction ni Castro.
Apang ang motion naman nga kakson sa record ang pahayag ni Castro tuhoy sa lukos ang gin-overrule.
Ang tensions sa hearing ang nag-init sang namalibad si Duterte nga magsabat sa pila ka pamangkot.
Gin-request man ni Duterte nga bayluhan si Quimbo bilang presiding officer nga ginsabat naman ni Quimbo nga ang pagpahalin sa presiding officer sa isa ka Congressional hearing ang indi sakop sang poder sang Vice President.
Base naman sa submission sang Commission on Audit nga ginpagwa ni Rep. France Castro sa deliberations sang OVP budget, yari ang gin-gastuhan ni Vice President Sara Duterte sang P125 million nga confidential funds sa 11 ka adlaw sang 2022;
*Purchase of information – P14M
- Payment of reward – P10M
- Rental and other incidental expenses relative to the maintenance of safe houses – P16M
- Purchase of supplies – P35M
- Provision of medical and food aid – P40M
- Payment of incentives for traveling related to confidential operations – P10M
Samtang, gin-defer naman sang House committee on appropriations ang deliberasyon sang Office of the Vice President nga 2 billion proposed budget para sa 2025 sa tunga sang pagpamalibad ni Sara Duterte nga magsabat sa mga pamangkot.
Ginhimo ni Zambales Representative Jeff Khonghun ang motion to defer, kag nagpabutyag sang pagkadismaya kay Duterte.
Natigayon ang motion nga wala sang objections ka gintalana ang budget deliberations sa Septyembre 10.
