Nagasalig ang Nacionalista Party (NP) nga sure win na bilang masunod nga House Speaker ang ila kapartido nga si Taguig Pateros Rep. Allan Peter Cayetano.
Sa interview sang Bombo Radyo Iloilo kay Iloilo 5th District Rep. Raul Tupas, iya ginpahayag nga formality na lang ang patigayunon nga botohay para sa masunod nga lider sang Kamara.
Suno kay Tupas, dako ang epekto sa hiwaton nga binotohay sa House speakership ang endorsement ni Presidente Rodrigo Duterte kay Cayetano.
Suno pa kay Tupas, dako nga development ang pag-endorso sang presidente kay Cayetano kag kay Marinduque Rep. Lord Alan Velasco bilang masunod nga lider sang Kamara kun sa diin may matabo nga termsharing sa House Speakership.
Pananglitan nga magdaog, Si Cayetano ang magapungko bilang House Speaker sa sulod sang 15 ka bulan kag si Velasco naman ang magapungko sa sulod sang 21 ka bulan.
Nagapati naman ang mamalidha nga sa mga nagahandom nga mangin lider sang Kamara, si Cayetano ang mas ginasaligan ni Duterte kun sa diin nangin running mate niya ini sang nakaligad nga Presidential Elections.
