Nanindugan si House Prosecution Panel Spokesperson kag Iloilo First District Representative Janette Garin nga magapabilin nga alegasyon lamang sang kampo ni Vice President Sara Duterte ang ginapahayag nga “Operation Romanov” tubtob wala sila sang mapresentar nga ebidensya sa impeachment court.
Sa interview sang Bombo Radyo kay Garin, ginpahayag niya nga yara sa depensa ang salabton nga pamatud-an ang pag-eksister sang ginapatihan nga operasyon nga ginapahayag nga rason sang mga pahayag ni Duterte batok kanday Presidente Ferdinand Marcos Jr., First Lady Liza Araneta-Marcos, kag anay Speaker Martin Romualdez.
Suno kay Garin, indi bastante ang mga alegasyon lamang agud hatagan rason ang pagpamahog sa kabuhi sang First Couple kag ni Romualdez.
Una na ginsiling sang depensa nga ang “Operation Romanov” amo ang surveillance kag intelligence operation batok kay Duterte kag sa iya nga pamilya matapos ini nga nagsipak sa administrasyon.
Apang sa pihak sini, ginsiling ni Garin nga wala nagakadapat ang amo nga reaskyon sang bise- presidente.
Suno pa sa iya, kun may pamahog batok kay Duterte, may ikasarang gid kuntani ini nga magpaimbestigar.
Gindugang pa ni Garin, nga sa pagkamatuod, subong pa lang gani sila nakabati tuhoy sa Operation Romanov.
![Pinterest](https://pinterest.com/pin/create/button/?url=https://iloilo.bomboradyo.com/rep-garin-bag-o-pa-lang-nakabati-tuhoy-sa-operation-romanov-nga-ginaalegar-magapatay-kay-vp-sara/&media=https://img.bomboradyo.com/iloilo/2026/07/house-deputy-speaker-garin.webp&description=Nanindugan si House Prosecution Panel Spokesperson kag Iloilo First District Representative Janette Garin nga magapabilin nga alegasyon lamang sang kampo ni Vice President Sara Duterte ang ginapahayag nga "Operation Romanov" tubtob wala sila sang mapresentar nga ebidensya sa impeachment court.){kind=link}