Hugot nga ginpanginwala ni House Deputy Speaker Cong. Janette L. Garin ang pagkaulamid sang iya pangalan sa kontrobersyal nga listahan sang mga ginatawag nga “congtractors” sa mga flood control projects sa pungsod.
Sa interview sang Bombo Radyo kay Dr. Janette L. Garin, ginpahayag niya nga indi matuod ang ginpalapta nga impormasyon kag suno sa iya, intensyon sang paggwa sang amo nga isyu nga patalangon ang publiko gikan sa kun sin-o gid ang ginatuyo ni Presidente Ferdinand “Bongbong” Marcos Jr. sa iya inisyatibo nga imbestigaran ang mga anomaliya sa flood control projects.
Suno sa iya, klaro nga gina-divert ang atensyon halin sa mga aktuwal nga ginadudahan nga personalidad.
Ginpabutyag pa ni Garin nga indi dapat tutukan ang mga peke nga impormasyon.
Ginpahayag man ni Garin nga pabor siya sa ginapatigayon nga imbestigasyon kag ginwelcome ini sang Kongreso.
Gin-athag man niya nga indi tanan nga flood control projects ang sala bangud madamo man ang ang naprotektahan nga komunidad bangud sa proyekto.
Ginpabutyag niya nga makit-an gid ang epekto sang proyekto, gani importante nga maimbestigaran ini sang insakto.
