Ginatugyan na lang ni Iloilo 1st District Rep. Janette Garin sa mga otoridad ang pagpa-imbestiga sa mag-asawa nga iya ginatumod kurap nga amo ang rason sa pag delay sang importasyon sang COVID-19 testing machines.
Ang mag-asawa ang may initials nga “V” kag “E” nga lunsay mga supplier.
Sa interview sang Bombo Radyo kay Rep. Garin, iya ginpahayag nga gina hoard sang mag-asawa ang equipment kag ginapangtago agud nga indi ini makuha ukon mabakal.
Suno kay Garin, magluwas nga naga hoard sang equipment ang mag-asawa, tuman man ka taas ang ginadugang sini sa presyo sang ila ginabaligya.
Masami lang pahayag niya nagahambal ang mag asawa nga indi available ang COVID-19 testing machine nga ginatawag nga Natch CS.
Nahibaluan nga ang ini nga mag-asawa amo ang naga facilitate sa importation sang 30 ka mga Natch CS automated extractor machines kag 40 PCR MA6000 machines sa pungsod.
Samtang, ginkakibot ni Iloilo 1st District Representative Janette Garin nga tuman ka mahal ang Covid-19 testing package sang Philippine Health Insurance Corportation (PhilHealth).
Iya ginpahayag nga ang Covid-19 testing package sang PhilHealth ang nagabalor P8,100.
Sa pagkamatuod, sa iban nga mga pungsod nagabalor lang ini sang P2,000 gani makatingalahan kun ngaa tuman ka mahal ang iya sang PhilHealth.
Suno kay Garin, makaluluoy ang mga Overseas Filipino Workers nga nagapauli sa Pilipinas bangud magluwas nga wala sang trabaho, kinahanglan pa nila nga magbayad para maka pa swab test.
Magluwas sini, may ginabaydan pa nga P500 para sa certification suno sa congresswoman.
Pahayag niya, importante gid nga mapaidalom sa testing ang mga tawo agud nga mahibaluan kun sa diin nagapanago ang virus, mabuligan nga makuha ang virus kag timprano pa nga mapahilayo ang tawo sa virus.
Pinaagi sa pag test sang mga symptomatic kag asymptomatic, ginapamagay sini ang source sang impeksyon.
Dugang pa sang natungdan, indi mahimo nga itudlo lang sang gobyerno sa pribado nga sektor ang pagpatigayon sang testing.
