ILOILO CITY – Pabor si Iloilo 1st District Representative Janette Garin sa modified community quarantine sa tion nga matapos ang Abril 30 nga enhanced community quarantine sa Luzon.
Ini ang kabahin sa gin-istoryahan sang mga health experts sa pagsinapol kaupod si Presidente Rodrigo Duterte kahapon nga adlaw, Abril 20.
Sa interview sang Bombo Radyo kay Rep. Garin, iya ginpahayag nga para sa National Capital Region kaangay sang Metro Manila kag mga dalagko nga syudad, mahimo nga ipatuman ang barangay lockdown agud nga indi man maapektuhan ang iban nga mga aktibidad.
Suno kay Garin, duha ka mga butang ang kinahanglan nga preparahan– una, amo ang quarantine center kag ang ika-duha amo ang aggressive testing center.
Indi man kumporme ang Congresswoman sa mga nagahambal nga ang pag-lift sang enhanced community quaranntine ang para sa mga negosyante lamang.
Ginplastar ni Garin sa pagsinapol nga bilang isa ka taga probinsya, lain man ang sitwasyon sang mga syudad sa Manila kag sa pila ka bahin sang mga probinsya sa Pilipinas.
Kinahanglan pahayag niya nga panumdumon nga indi lang Coronavirus Disease 2019 ang balatian sa Pilipinas.
May yara sang mga naga pa dialysis nga apisar covered sang Philippine Health Insurance Corporation, may yara sa gihapon sang balaydan; amo man ang mga cancer patients nga kinahanglan sang kwarta para mag pa chemotherapy; ang mga may yara sang maintenance medication kaangay sang mga may highblood kag sakit sa tagipusuon kag tungod nga lockdown, wala sang trabaho kag wala sang makuhaan sang kwarta sa pagpabulong, makaluluoy ang mga pasyente.
Isa man sa gin rekomenda ni Garin amo ang free flow of trade sang mga produkto kaangay sang utan, isda, karne kag manok halin sa mga probinsya sa Pilipinas.
Gin-athag niya nga indi para sa mga negosyante ang partial economic activity kundi para sa mga Filipino agud indi ang mga ini magutman kag mangin bastante sa supply sang pagkaon.
