Emosyonal nga nagpasalamat si Iloilo City Lone District Representative Julienne “Jam-jam” Baronda sa mga nagsuporta kag nagbuylog kay former Mayor Jed Patrick Mabilog agud makuha ang executive clemency.
Sa interview sang Bombo Radyo kay Rep. Baronda, iya ginpahayag nga sa pito ka tuig, nasaksihan niya ang naagyan nga sakripisyo sang anay alkalde.
Suno kay Baronda, ini ang pinakadasig nga paghatag sang executive clemency sa isa ka anay opisyal sang gobyerno.
Nagapati man ang natungdan nga nakit-an sang yara sa ibabaw nga mga opisyal ang nangin serbisyo ni Mabilog sa Iloilo City.
Nagpasalamat man ang natungdan kay House Speaker Martin Romualdez kag sa House Quad Committee bangud sila ang nangin balagan agud mabuksan ang kaso ni Mabilog.
Nahibaluan nga si Mabilog ang may ginapangatubang nga kaso nga paglapas sa RA 3019 ukon ang Anti-graft and Corrupt Practices Act kag RA 6713 ukon Code of Conduct and Ethical Standards for Public Officials.
Ini ang nag-ugat sa gin-alegar nga vehicle towing contract nga ginpirmahan sang anay alkalde sang 2015.
Madumduman nga sang nagligad nga Septyembre 2024 sang nagpauli si Mabilog sa Pilipinas halin sa Estados Unidos matapos ang pila ka tuig nga pagpanago para sa iya seguridad matapos nalakip ang iya pangalan sa narcolist ni former President Rodrigo Duterte sang 2017.
