ILOILO CITY – Tuman ang pagpasalamat ni Iloilo City Lone District Representative Julienne “Jamjam” Baronda bangud sa pagkilala sa iya serbisyo.
Sa ginpatigayon nga “Boses ng Bayan”, isa ka independent kag non-commissioned survey nga ginpatigayon sang RP-Mission and Development Foundation, Inc. sa job performance sang District Representatives sa Western Visayas, statistically no. 1 si Baronda nga may rating nga 88.5 percent.
Kaupod niya sa top spot sanday Iloilo Third District Representative Lorenz Defensor nga may 88.9 percent rating kag Negros Occidental Third District Representative Kiko Benitez nga may 88.2 percent rating.
Lakip sa survey parameters ukon criteria nga gingamit amo ang district representation, legislation, constituent service, ethics and accountability kag accessibility and responsiveness.
Sa interview sang Bombo Radyo kay Baronda, iya ginpahayag nga nagapakita lamang ini nga ang iya serbisyo ang nahatag niya kag nabatyagan sang mga pumuluyo sang syudad.
Himuon niya ini nga inspirasyon kag isa man ka pagpanghangkat agud nga pasanyugon pa ang iya serbisyo.
