ILOILO CITY – Ginakonsiderar ni Iloilo City Rep. Jerry Treñas ang pagkandidato sa pagka-alkalde sang siyudad sang Iloilo sa 2019 elections.
Ini ang ginkumpirma ni Treñas, kadungan sang pagpatawag sini sa mga barangay kapitan sang siyudad.
Suno sa mamalidha, ginkuha niya ang consensus sang mga kapitan kag ginduso siya nga magpadalagan bilang alkalde.
Nahibaluan nga manugtapos na ang termino ni Treñas bilang mamalidha.
Una na nagpabutyag si Treñas nga magaretiro sa pulitika.
Apang paathag sini, nagbag-o ang iya pinsar bangud madamo ang naghambal sa iya nga bata pa siya para magretiro sa pulitika kag madamo pa ini sang mabulig para sa siyudad.