Iloilo – Nakigsapol si Iloilo 2nd District Representative Michael Gorriceta sa Department of Public Works and Highways kasunod sang nangin sitwasyon sang trapiko bangud sa depektibo nga Ungka Flyover.
Nahibaluan nga kahapon, nagserbi nga overpass ang Ungka flyover sang nag-agi diri ang mga commuters nga nagpalanaog sa mga salakyan kasunod sang halos wala nagahulag nga trapiko nga resulta sang road widening sa palibot sang flyover.
Sa interview sang Bombo Radyo kay Rep. Gorriceta, iya ginpahayag nga naghingyo siya kay Department of Public Works and Highways Region 6 Assistant Regional Director Engineer Jose Al Fruto nga sa masunod nga mga operasyon nga ginahimo sa Ungka Flyover, dapat nga sa gab-i ini himuon kag tapuson.
Suno kay Gorriceta, indi pwede nga sa aga himuon ang operasyon bangud pat-od nga maapektuhan ang dalagan sang trapiko.
Nagpangayo man sang pasaylo ang mamalidha bangud sa huol nga natuga sa mga motorista.
Nahibaluan nga ginpahayag man sang mamalidha nga sang nagbisita si Public Works Secretary Manuel Bonoan sa amo nga lugar, ginpromisa ni Al Fruto nga antes ang Pebrero 14, mahingagaw na sang ahensya ang pagtapos sa road widening sa idalom sang flyover.
