ILOILO – Wala sang position nga padalaganan si Iloilo 2nd District Representative Michael “Mike” Gorriceta para sa 2025 midterm elections.
Sa interview sang Bombo Radyo kay Gorriceta, iya ginpahayag nga may mga nagtanyag sa iya nga mapadalagan bilang bise gobernador kag ginkonsidera man niya ini sadto.
Apang sang ulihi, napinsaran sini nga alang-alang pa siya sa nasambit nga position.
Suno kay Gorriceta, bangud ginkonsidera man niya ang vice gubernatorial seat, luyag niya nga may masaligan man nga tawo nga magabulos sa iya.
Ini man ang nagtulod sa iya agud padalaganon bulos sa iya ang iya tiayon nga si Dr. Kathryn “Kathy” Joyce Gorriceta nga masami nga “behind the scenes” ukon naga-upod upod lang sa iya pagpatuman sang mga programa.
Gin-ako man sang kongresista nga nagpadulong sila sang iya asawa kay former Senate President Franklin Drilon nga maninoy sini agud magkonsulta sa patag sang pulitika.
Nangin positibo man suno sa natungdan ang reaksyon ni Drilon sa plano nila nga mag-asawa.
Suportado man nila suno sa natungdan si Iloilo Governor Arthur Defensor, Jr. kag running mate sini nga si Anilao, Iloilo Mayor Nathalie Ann Debuque.
Sa subong, ginalantaw ni Gorriceta ang national position sa ahensya sang gobyerno.
