ILOILO CITY- Ginahulat pa ni Iloilo 2nd District Rep. Michael Gorriceta ang mangin sabat ni Department of Foreign Affairs (DFA) Secretary Teodoro Locsin Jr. sa sulat nga ginpadala sang mamalidha sa tiglikom may kaangtanan sa ginaalegar anomaliya sa DFA Consular Office sa Iloilo.
Sa interview sang Bombo Radyo kay Rep. Gorriceta, iya ginpahayag nga nagpadala siya sang sulat agud ipalab-ot kay Locsin ang mabudlay nga pag-secure sang appointment slots sang mga luyag mag-apply ukon mag-renew sang passport ilabi na ang mga Overseas Filipino Workers (OFWs).
(DFA)
Suno kay Gorriceta, ginhingyo niya kay Locsin sa amo nga sulat nga dugangan ang personnel agud mapadasig ang passport application kag renewal sa amo nga opisina.
Pahayag sang mamalidha, mas maayo man nga may yara sang ibutang nga priority lane para sa mga senior citizenS, Persons With Disability (PWD), kabataan, nagabusong kag OFW.
Dugang pa sang opisyal, wala dapat ginapabudlayan ang mga OFW sa ila transaksyon bangud nga isa ang ila sektor sa nagabayad sang tax sa pungsod.
Natingala man ang natungdan kun ngaa kinahanglan pa nga magpadulong sa Bacolod agud magtransaksyon sa DFA apisar may consular office man sa Iloilo.
