ILOILO CITY-Ginpasakaan sang kaso sanday Davao City Rep. Paolo Duterte, anay Bureau of Customs (BuCor) commissioner Nicanor Faeldon, kag si Manases Carpio nga bana ni Vice President Sara Duterte, may kaangtanan sa pagkarekober sang otoridad sa P6.4 billion shabu sang 2017.
Sa complaint-affidavit nga gin-file ni former Sen. Antonio Trillanes sa Department of Justice, ang tatlo kag pito ka iban pa ang akusado sa pagkumiter sang conspiracy sa pag- smuggle sang 600 kilos sang shabu.
Gin-base ni Trillanes ang iya complaint sa report sang Senate Blue Ribbon Committee nga nagpatigayon sang hearings sa amo nga insidente.
Ginpanginwala naman sang mga Duterte ang akusasyon kag gintawag ini nga “harassment.”
Suno naman kay Rep. Duterte, ini nga mga kaso ang ginakabig niya nga welcome development bangud sa Korte sang Pilipinas ang hearing kag indi sa korte sang Facebook kag utok sang isa ka ‘trililing’ nga suldado.
Ginpakamalaot naman sini si Trillanes bangud sa ginaalegar paghimo sang wala sang basehan nga akusasyon.
Una na ginpatpat ni Trillanes nga sang Mayo 17, 2017, nag-abot ang shabu shipment halin sa China sa Manila International Container Port kag gin-aprubahan para sa release paagi sa “Green Lane” ukon express lane,nga wala na naga-require sang dugang nga screening kaangay sang X-ray.
Gintumod pa ni Trillanes ang testimoniya ni Customs broker Mark Ruben Taguba nga sanday Duterte kag Carpio, nga ginasiling nga mga myembro sang Davao Group, ang nagkinahanglan lang nga magtawag sa BOC collector nga si Jet Maronilla agud magpatigayon sang clearance sa amo nga container.
Si Faeldon naman ang ginapatihan nga nag-impluwensiya sa kaupod nga respondents agud malaktawan ang chain of custody kag patigayunon ang shipments ni Taguba.
Gin-engganyo ni Trillanes ang Department of Justice nga mag- initiate sang preliminary investigation kag filing of charges sa violation sang Comprehensive Dangerous Drugs Act batok sa tanan nga respondents, kag violation sang Anti-Graft and Corrupt Practices Act para kay Duterte, Carpio, Faeldon, kag apat ka iban pa.
