ILOILO – Ginatinguhaan nga liwat nga makabalik sa normal ang operasyon sang Rep. Pedro G. Trono Memorial Hospital sa Guimbal, Iloilo.
Ini matapos nga ginlockdown ang ospital kasunod sang pagpositibo sa COVID-19 sang 41 sa 276 nga mga medical personnel sa ospital, santo sa pinakaulihi nga data nga ginpaguwa.
Ang mga nasambit nga medical personnel nga lunsay nagpositibo ang ginabug-usan sang mga doktor, nurses, nursing aides kag iban pa nga staff.
Sa interview sang Bombo Radyo kay Dr. Cynthia Cabangal Ng, head sang Hospital Management Office sang Iloilo Provincial Government, iya ginpahayag nga amat-amat pa lamang ginabuksan ang pila ka bahin sang ospital.
Suno kay Ng, may kakulang sa gihapon sang manpower ang ospital rason nga indi maakomodar ang tanan nga pasyente kun liwat na ini nga buksan para sa publiko.
Gin-athag man sang doktor nga yara na sa maayo nga kahimtangan ang mga empleyado nga nagpositibo sa COVID-19.
Magapatigayon man suno kay Ng sang imbestigasyon may kaangtanan sa ginhalinan sang COVID-19 sa amo nga ospital.
Sapihak sang mga pagpanghangkat, nagapasalamat man ang natungdan sa mga empleyado sang Rep. Pedro G. Trono Memorial Hospital sa serbisyo nga ginahatag.
Matandaan nga partial nga nagbukas sa publiko ang nasambit nga ospital sang Enero, 3.
