ILOILO CITY- Gin-athag sang isa sa mga authors sang House Resolution No. 2075 nga nagaduso sang pag-imbestigar sa OCTA Research Group angot sa ila projections, methodologies kag qualifications sang mga miyembro, nga wala siya nagapamatok sa ginahimo sang nasambit nga grupo.
Sa interview sang Bombo Radyo kay AAMBIS- OWA Party list Representative Sharon Garin, iya ginpahayag nga luyag lang niya nga matul-id kon insakto ukon sala ang ginahimo sang OCTA Research.
Suno kay Garin, tuman ka maimpluwensiya ang nasambit nga grupo bangud nga sa ila mga findings nagadepende ang paghimo sang desisyon sang National Inter-Agency Task Force for the Management of Emerging Infectious Diseases (NIATF-EID) kaangay sang pagpatuman sang lockdown ukon quarantine classifications.
Pahayag pa sang mamalidha, mas maayo man kuntani nga makatukod man sang kaugalingon nga research group ang gobyerno agud nga indi na lang magsalig ang desisyon sang NIATF sa kon ano ang rekomendasyon sang OCTA group.
Ang House Resolution No. 2075 ang gin-file nanday Garin, Reps. Bernadette Herrera-Dy sang Bagong Henerasyon party-list, Kristine Singson-Meehan sang Ilocos Sur, Stella Quimbo sang Marikina kag Jesus “Bong” Suntay sang Quezon City.
