ILOILO CITY- Nagpabutyag sang pagpabor si AAMBIS- OWA partylist Rep. Sharon Garin sa paglakip sang nuclear energy bilang isa sa mga sources sang enerhiya sa Pilipinas apang nagapamatok ini sa pag-revive sang Bataan Nuclear Power Plant.
Sa interview sang Bombo Radyo kay Garin, iya ginpahayag nga tuman na ka daan ang amo nga planta gani mas maayo para sa pungsod nga mag-explore sang moderno nga pamaagi sa paggamit sang nuclear energy agud indi ini makahalit sa palibot.
Suno kay Garin, mas maayo nga gamiton nga ehemplo sang Pilipinas ang mga pungsod kaangay sang France kag Japan nga nagagamit sang nuclear energy nga safe bangud sa teknolohiya.
Matandaan nga nag-isyu si Presidente Rodrigo Duterte sang executive order nga naga- commit sang Pilipinas nga mag- develop sanf nuclear energy program bilang isa ka national policy.
Nasaad man sa EO nga ang Nuclear Energy Program-Inter-Agency Committee (NEP-IAC) nga gintukod sang 2020 ang dapat nga magpatigayon sang dugang nga pagtuon kag maghimo sang rekomendasyon angot sa paggamit kag viability sang Bataan Nuclear Power Plant kag establishment sang igan nga pasilidad para sa utilization sang nuclear energy.
