ILOILO CITY – Nagalaum kag nagapangamuyo si Iloilo City Rep. Jerry Treñas nga magapabilin nga mapag-on ang political alliance nila sang bilas nga si Mayor Jose Espinosa III.
Sa tunga ini sang ginapanan-aw nga pag-engkuwetruhanay nila ni Espinosa sa pagka-alkalde sang siyudad sa 2019 elections.
Sa interview sang Bombo Radyo, ginpahayag sang mamalidha nga nagalaum siya nga maagi lang ang amo nga pagtilaw sa relasyon nila ni Espinosa.
Mas malahalon suno kay Treñas ang political history nila ni Espinosa labaw sa pagka-bilas nila.
Ginpahayag sang kongresista nga soltero pa lang sadto si Espinosa, magkaupod na sila sa pulitika.
Padayon man ang paghingyo ni Treñas sa bilas nga mag-atubangay sila agud maka-istorya.
Ginpahayag sang mamalidha nga sumugod sang nagpungko ang bilas bilang alkalde tal-os kay anay Mayor Jed Patrick Mabilog, wala na ini naga-istorya sa iya.
Makapila ka beses siya suno kay Treñas naghingyo sa alkalde nga mag-istoryahanay sila apang wala ginasapak ni Espinosa.
Pagkatapos niya magdeklarar nga ginakonsidera ang pagpadalagan bilang alkalde sang siyudad, ginpahayag ni Treñas nga nag-reach out man siya sa bilas, apang wala man ginsapak ni Espinosa.