Rep. Tupas, ginkalipay nga napasar sa 3rd reading ang HB 6817

ILOILO – Malipayon si Iloilo 5th District Representative Raul “Boboy” Tupas nga napasar na sa 3rd reading ang House Bill 6817 ukon ang nagadumili sa pag-diskriminar sa mga kupirmado, suspected, probable kag recovered cases sang Coronavirus Disease 2019 (COVID-19), repatriated workers, health care workers, responders kag service workers.

Si Rep. Tupas ang isa sa mga principal authors sang nasambit nga hagna.

Sa interview sang Bombo Radyo kay Tupas, iya ginpahayag nga katuyuan sang hagna nga mangin isa na lang ang layi para sa Pilipinas agud ma proteheran ang kinamatarong sang mga natungdan.

Suno sa iya, ang pagbalibad naman sang hospital sa isa ka pasyente nga ma-admit ang wala na madala sa hagna bangud yara na ini sa pagsulundan sang Department of Health.

Sa tion nga ini na ang mapasar, pahayag niya, mahimo ma preso sang indi magnubo sa anum ka bulan apang indi man maglampas sa lima ka tuig.

Magluwas sa pagka-preso, may baydan man nga multa nga indi magnubo sa P50,000 apang indi man mag sobra sa P500,000.

Samtang madamo naman sang nagapati ilabi na sa security sector nga “dead letter law” ukon mabudlay ipatuman, indi practical kag indi epektibo ang Human Security Act of 2007.

Gani apisar may yara na sang naga-eksister nga layi tuhoy sa terorismo, nagpasar liwat ang Kamara sang Anti-Terrorism Act of 2020 kag ini ang gin-sertipika ni Presidente Rodrigo Duterte bilang urgent.

Suno kay Tupas nga amo ang chairman sang committee on national defense and security sa Kamara, humalin sang 2007 tubtob subong, isa ukon duha lang ka kaso ang napasaka sa isa ka suspek bangud mabudlay ma kilala ang terorista.

Sa subong nga hagna nga ginaduso, apisar nagapalano pa lang sang terorismo, mahimo na ini madakop sang militar ukon pulis.

Sa mga naga kontra sa sini nga hagna, mahimo pahayag sang mamalidha nga nakulbaan ang mga ini sa interpretasyon kag sa pagpatuman sang layi.

Apang dugang sang natungdan, sa interpretasyon sang layi, kinahanglan nga saligan ang korte samtang sa pagpatuman naman sang layi, saligan lang ang executive branch sang gobyerno.