ILOILO CITY – Ginaimbestigaran na sang COVID-19 team sang syudad sang Iloilo ang inisyal nga report nga nag-abot kay Mayor Jerry Treñas nga may nagtuyo naman liwat nga magpalusot sang peke nga COVID-19 vaccination ticket sa inoculation site.
Sa interview sang Bombo Radyo kay Mr. Jeck Conlu, spokesperson sang Covid-19 Team, iya ginpahayag nga gina-scan sang pila ka indibidwal ang original nga vaccination ticket kag gina-print kag amo ang ginagamit.
Apang suno sa natungdan, mahibaluan man ini gihapon sang otoridad bangud may yara sang security details ukon features ang vax ticket nga iya sang Iloilo City Government kag lain nga papel ang ginagamit.
Sa subong mas ginhugtan pa suno kay Conlu ang pagbantay sa mga sites.
Posible suno kay Conlu nga luyag lang sang mga tawo nga madala sa mga nagapabakuna apang indi ini pwede suno sa iya bangud kinahanglan pa nga mag-agi sa husto nga proseso.
