Naga amat-amat na nubo ang infection sang Coronavirus Disease 2019 (COVID-19) sa Western Visayas base sa reproductive number kun ano kadasig maglaton ukon magdamo ang virus.
Sa interview sang Bombo Radyo kay Dr. Philip Ian Padilla, pinuno sang Division of Biological Sciences, College of Arts and Sciences sang University of the Philippines Visayas – Miagao, iya ginpahayag nga target sang rehiyon nga mangin zero ang reproductive number sang COVID-19 kag sa subong, yara na sa “less than one” ang Western Visayas.
Suno kay Padilla, subong nga ginpaidalom na sa General Community Quarantine ang rehiyon, kinahanglan nga mangin istrikto sa gihapon ilabi na sa kaugalingon pinaagi sa pagdumdom nga maghugas sang kamot , pag obserba sang social distancing kag pag gamit sang mask.
Tuman man ka importante pahayag niya ang mass testing sa diin kinahanglan nga mas hatagan sang igtalupangod amo ang mga naka close contact sang COVID-19 positive kag ang mga expose sa guwa kaangay sang mga frontliners agud nga ma punggan ang paglapta sang virus.
Sa pagkamatuod, nagalab-ot na sa 400 tubtob 500 ka mga samples ang mahimo nga mabaton sang Western Visayas Medical Center Subnational Laboratory.
Panugyan ni Dr. Padilla, sa mga may flu-like symptoms, indi pagtaguon ang kondisyon agud nga indi man malatnan ang komunidad kag sa mga tawo naman, indi pagpakahuy-an ukon pakamalauton ang sin-o man nga COVID-19 positive.
Sa subong nga “new normal”, kinahanglan sang publiko nga mag adjust kag sa tion nga magsaka ang kaso sang COVID-19, nagapati ang doktor nga bastante pa ang health system sang rehiyon kaangay sang health cemter kag quarantine facilities nga pahamtangan sang mga pasyente.
