Nagsulat ang duha ka Republican senators kay United States President Joe Biden agud hingyuon ini nga iplastar ang kumpleto nga lista sang options sang Pentagon kag State Department agud nga mabuligan kag masuportahan ang Pilipinas kasunod sang mga pagpang-harass sang China sa West Philippine Sea partikular sa Ayungin Shoal kun sa diin nahamtang ang daan nga warship nga BRP Sierra Madre.
Hulyo 12 sang ginsulat ini nanday Senador Roger Wicker kag Senador Jim Risch nga amo ang highest ranking Republicans sa Senate Armed Services Committee kag Senate Foreign Relations Committee.
Suno sa duha ka opisyal, dapat nga kit-anon gid kag konkreto ang demonstrasyon sang suporta sang Estados Unidos sa Pilipinas. Kun magkulang lang sang gamay nga suporta suno sa duha, magaguwa nga indi handa ang Estados Unidos nga tumanon ang bilateral commitments sini.
“We must respond with visible and concrete demonstrations of our support. Anything short of this risks our appearing unwilling to honor our bilateral commitments,” pahayag sa sulat.
Kaangot diri, gin-request nanday Wicker kag Risch ang kumpleto nga lista sang military, diplomatic, kag economic options nga amo ang ginabalay sang Departments of State kag Defense bilang suporta sa Pilipinas.
Matandaan nga una na nga ginpahayag ni President Ferdinand “Bongbong” Marcos Jr. nga dapat mas masobra pa ang himuon sang Pilipinas ipaanggid sa pag-file lamang sang protesta sa tion nga may “illegal action” ang China batok sa mga Pilipino sa West Philippine Sea.
Wala pa naghingyo ang Pilipinas sang bulig sang Amerika sa pag-resupply sa tropa sa Ayungin Shoal kag wala man sang plano pa nga i-invoke na ang pito ka dekada nga Mutual Defense Treaty (MDT) agud nga mabuligan sang Amerika ang Manila pag-abot sa depensa.
Ang pinakaulihi nga natabo nga pagpang-harass amo ang nagluntad sang nagligad nga Hunyo 17 kun sa diin ginbanggaan sang China Coast Guard ang mga Pinoy sa Ayungin Shoal, ginbungguaan kag gingisian ang sakayan, ginkawat ang mga armas nga dal-on kuntani sa BRP Sierra Madre, kag sang ulihi, nautdan pa sang tudlo ang isa ka Philippine Navy personnel.
Gintawag ni President Marcos nga “iligal” ang amo nga aktwasyon apang indi pa ini suno sa iya makabig nga isa ka armed attack.#
