Nagpaguwa ang Commission on Elections sang Resolution No. 11265 kun sa diin ginadumilian ang pagrelease, pagdisburse, kag amo man ang paggasto sang public funds para sa social welfare and services kag housing-related projects sang government offices, magluwas na lamang kun awtorisado ini sang COMELEC.
Sa interview sang Bombo Radyo kay Jonathan Sayno, Election Assistant Officer II sang COMELEC Iloilo City, iya ginpahayag nga mangin apektado gid sang 2026 Barangay kag Sangguniang Kabataan Elections (BSKE) ang mga programa kag ang proyekto sang Iloilo City Government.
Kabahin diri amo ang mga ayuda lakip na ang TUPAD, AKAP, AICS kag 4Ps.
Nahibaluan nga nangin epektibo ang nasambit nga banning sang Setyembre 18 nga magalawig tubtob Nobyembre 1, 2026.
Apang ginklaro man mismo ni Sayno nga kun may luyag padayunon nga proyekto ang City Government tubtob Oktubre 30 ukon antes ang eleksyon, kinahanglan anay sini nga magfile sang request for exemption sa Law Department sang head office sang COMELEC.
Nahibaluan nga nagfile na sang request for exemption ilabi na para sa Medical assistance sang Iloilo City Government sang nagligad pa nga Hulyo may kaangtanan sa Election ban, apang tubtob subong, wala pa sa gihapon ini naaprubahan.
Suno kay Mayor Raisa Treñas, 40 ka social services kag welfare programs, samtang masobra 160 naman ka infrastructure projects ang apektado sang nasambit nga election ban.
