Nag-file sang protesta ang China agud balabagan ang opisyal nga request sang Pilipinas sa United Nations nga pasangkaron ang boundary sini sa West Philippine Sea.
Matandaan nga gin-anunsyo sang Department of Foreign Affairs nga paagi sa Philippine Mission to the UN in New York, sang Hunyo 14, may ginpasa nga impormasyon sa United Nations (UN) Commission on the Limits of the Continental Shelf (CLCS) agud ma-rehistro ang entitlement sang Pilipinas sa extended continental shelf (ECS) sa West Palawan Region sa West Philippine Sea.
Ini nga UN body amo ang nagalantaw sang implementasyon sang UNCLOS sa establishment sang outer limits sang continental shelf nga lapaw sa 200 nautical miles halin sa baselines.
Apang sa note verbale nga ginpadala sang Beijing kay UN Secretary-General António Guterres, ginsiling sini nga ang China ang may soberanya sa Nanhai Zhudao kag sa kaiping sini nga parte sang kadagatan, kag ini ang may sovereign rights kag hurisdiksyon sa amo nga area.
Ini nga posisyon suno sa China ang consistent kag maathag halin sang una kag nahibaluan na ini sang international community lakip sang Pilipinas.
Ang “Nanhai Zhudao” ang nagakahulugan nga “the South China Sea Islands” kag covered sini pati ang island groups nga iya na sang Pilipinas ukon ang West Philippine Sea amo man ang teritoryo sang Vietnam, Taiwan, kag Malaysia.
“The continental shelf beyond 200 nautical miles as contained in the aforementioned Submission by the Philippines has seriously infringed China’s sovereignty, sovereign rights and jurisdiction in the South China Sea. In accordance with Article 5(a) of Annex I to the Rules of Procedure of the Commission on the Limits of the Continental Shelf, the Chinese Government seriously requests the Commission not to consider the Submission by the Philippines,” pahayag pa sang China.
Nahibaluan nga ikaduha na ang ginpasa sang Pilipinas sa UN kaangot sa ECS entitlement.
Una nga may ginpasa sang 2009 nga naangot sa Philippine Rise ukon ang ginatawag anay nga Benham Rise kag sang 2012, ginkumpirma sang UN body nga ini kabahin sang continental shelf and territoryo sang Pilipinas.
