JAPAN – Kapin duha ka semana na lang antes ang pormal nga pag-umpisa sang Tokyo Olympics apang may mga diskumpyado gihapon sa COVID-19 situation sa Tokyo sa Japan.
Ini ang kasunod sang pag-anunsyo ni Japanese Prime Minister Yoshihide Suga nga may nakit-an nga pagtimbuok sa kaso sang Delta variant sang coronavirus – isa ka sitwasyon nga gintawag sang isa ka government adviser nga “very, very worrying”.
Suno kay Bombo International Correspondent Josel Palma direkta sa Japan, nagpasalig man si Suga nga may hugot nga mga pagsulundan nga ipatuman agud nga malikawan nga ang mga atleta halin sa iban nga mga pungsod ang makadala sang amo nga virus sa Japan.
Apisar sini, madamo sang mga researchers nga nakabase sa Japan nga nagapanindugan nga mangin dominante pa ang Delta variant antes mag-umpisa ang Olympics sa Hulyo 23.
Nagpaandam ini nga mga researchers nga ang mataas nga numero sang international visitors ang makaresulta sa mas madamo nga exposures kag makapataas sang tyansa nga maglapta ang ini nga mas makalalaton nga variant.
Indi kumbinsido ang mga reseachers sa COVID-19 measures nga ginapatigayon bangud kalabanan sang populasyon sa Japan ang indi pa vaccinated.
25% pa lang sang kabug-usan nga populasyon ang nakabaton sang first dose sang bakuna.
Magabukas sa Hulyo 23 ang Olympics Games kag isunod naman ang Paralympics nga posible matabo sa tunga tunga sang Agusto 25 kag Septyembre 6.
