GUIMARAS – Nagalibog ang ulo ni Buenavista, Guimaras Mayor Eugene Reyes matapos wala ginbaton sang Guimaras Provincial Government ang iya ginpatuman nga resident ID System.
Sa exclusive interview sang Bombo Radyo kay Reyes, iya ginpahayag nga nakabaton siya sang reklamo matapos nga wala ginbaton ang computer generated ID System sang pasahero sang yara na ini sa pantalan.
Suno sa alkalde, ang nasambit nga outbound pass ang computer generated kag may bar code sa diin indi na kinahanglan pa nga magsulat ang pasahero.
Ginpahayag ni Reyes nga ang nasambit nga lihok ang makabulig kuntani para sa madasig nga contact tracing sa tion nga may yara sang magpositibo sa COVID-19 sa ila lugar.
Dugang pa sang alkalde, parehos man nga duag puti ang resident ID System kag sa outbound/inbound pass nga gina isyu sang Guimaras Provincial Government apang mas manipis lang ang ginhatag sa mga residente sang Buenavista, Guimaras.
