𝗜𝗟𝗢𝗜𝗟𝗢 𝗖𝗜𝗧𝗬 —Ginakabalak-an sang mga residente kag barangay officials sang Brgy. Calumpang, Molo, Iloilo City, ang nagataas nga kaso sang dengue sa ila nga lugar.
Sa interview sang Bombo Radyo kay Punong Barangay Lolita Maprangala, iya ginpahayag nga magapatawag siya sang emergency meeting kaupod ang ila nga opisyales agud nga matutokan ang nagadamo nga kaso sang positibo sa dengue sa ila nga komunidad.
Suno kay Maprangala, sa subong, may yara sang 11 ka mga kaso sang dengue ang na-record sa ila nga lugar, kon sa diin, may yara nga kabataan ang nagahilanat kag naga-ekspeyensya sang sintomas sang dengue apang indi pa kumpirmado.
Ginpahayag man sini nga magapatuman bwas nga adlaw sang misting sa pila ka areas sang ila nga barangay agud nga mahagan-hagan ang pagsaka sang numero sang nasambit nga balatian.
Nagpasalig naman ang City Health Office nga magapadala sang mga kinahanglanon nga kagamitan agud nga makabulig sa pagpapas sang mga lamok sa lugar.
