Nagpa-Bombo ang isa ka residente sa Barangay Rizal Lapuz Sur matapos nadismaya sa ila punong barangay nga nagpa-untat sa ila sa pagbaligya sa guwa sang gym apisar nga amo lang ini ang ila palangabuhian matapos nasunugan.
Sa interview sang Bombo Radyo kay Jessica Gustilo, tag-reklamo, iya ginpahayag nga ginsaway sila ni Punong Barangay Wilson Allona nga indi na magbaligya bangud ginagamit nila ang suga sang barangay.
Suno kay Gustilo, amo lang ini ang ila palangitan-an para makatibawas man adlaw-adlaw matapos nalakip ang ila balay sa nasunog sang Enero 7.
Gin-alegar man sini nga ginabasol sila nga sila ang ginhalinan sang sunog, apang ginklaro sini nga wala man sang may gusto nga matabo ang amo nga insidente.
Ginhatagan man sila sang plaso nga tubtub sa Marso 25 agud makasaylo na apang wala pa sila makahibalo kun sa diin sila ma-istar sang temporaryo.
SABAT SANG PUNONG BARANGAY
Sa interview naman sang Bombo Radyo kay Punong Barangay Wilson Allona, ginpahayag sini nga nagpasugot siya nga magbaligya ang mga residente sa guwa sang gym sang Dinagyang Festival para may income man sila.
Apang suno sa kapitan, indi na ini pwede mapadayon bangud wala man sang permit kag may mga balay man sa atubang sang gymnasium.
Suno kay Allona, mahimo man makabaligya ang mga residente, apang masaylo lang sa talipapa.
Gindugang sini nga bastante man ang ayuda nga ginahatag sa mga nasunugan halin sa Department of Social Welfare and Development Office.#
