Nagpa-BOMBO ang mga residente sang Brgy. Balanak, Janiuay, Iloilo kasunod sang naguba nga dalan sa ila lugar nga posible magresulta pa gid sang mas malala nga insidente kon indi dayon matagan sang solusyon.
Sa interview sang Bombo Radyo kay Mayor Paulino Parian, ginpahayag sini nga gilayon ginhatagan sang aksyon ang problema paagi sa Municipal Engineering Office.
Ginpatuman ang inisyal nga solusyon paagi sa pagbutang sang drainage system, apang naguba man ini bangud gamay lang ang ginamit nga tamburong.
Ginpasiguro ni Mayor Parian nga ila na ini gina-ayo subong paagi sa pagbutang sang mas manami kag mas mapag-on nga tamburong agud magtawhay na ang daloy sang tubig kag malikawan ang paglala sang dalan.
Ginalantaw nga umpisa gilayon ang proyekto pag-apruba sang Program of Works kag pangitaan na sang pondo.
Ginapaninguhan sang lokal nga panguluhan nga mapatigayun ini sa pinakamadali nga panahon para sa seguridad sang mga residente.
