πππ’πππ’ πππ§π¬ β Ginatudlo nga rason sang mga residente sang Brgy. Bito-on, Jaro, Iloilo City ang creek nga gintampukan kon nga madasig nga nagasulod sa ila ang tubig-baha.
Sa interview sang Bombo Radyo kay Melinda Bactong, residente sang nasambit nga lugar, iya ginpahayag nga ginsirado sang pribado nga nagapanag-iya ang pila ka porsyon sang creek, rason nga sila ang nagasalo sang tubig-baha.
Suno kay Bactong, sang-una, maayo pa ang flow sang tubig, apang sa subong, masami na nga nagasaka sugod sang ginsirado ang amo nga porsyon sang creek.
Ginpahayag man sini nga dapat wala gintampokan ang creek agud madasig ang flow sang tubig-baha ilabi na subong nga tig-ululan.
Ginkasubo man sini nga indi sila kapangita sang palangabuhian bangud sa tubig-baha nga nagasulod sa ila nga lugar.
Anay naman nga nagpadulong ang punong barangay sa amo nga lugar agud sekyaron ang creek.
Suno kay Punong Barangay Jonalyn Provido sang Brgy. Bito-on, Jaro, iya ginpahayag nga indi dapat pagpunggan ang creek bangud nagatuga ini sang pagbaha sa mga residente ilabi na sa yara sa manubo nga lugar.
Ginpahayag man sini ang pader ang rason kon ngaa nangin mahinay ang flow sang tubig kag nangin kabangdanan man nga magkipot ang creek.
Nagpadulong naman ang natungdan sa tag-iya agud nga himuan sang solusyon, sa diin, nagpasalig naman ini nga magkoordinar sa ila nga mga opisyales.
Bukas naman ang barangay sa mga residente nga may luyag nga mag-evacuate ilabi na ang mga naapektohan sang baha.
