𝗜𝗟𝗢𝗜𝗟𝗢 𝗖𝗜𝗧𝗬 — Nagakabalaka ang pila ka mga residente sang Barangay Calubihan, Jaro, Iloilo City sa posible nga pagsaka sang tubig-baha ilabi na nga nagsulod na sa tig-ululan ang panahon.
Sa interview sang Bombo Radyo kay Melchor Latuna, residente sang nasambit nga lugar, iya ginpahayag nga madasig nga nagasulod ang baha sa ila nga ugsaran ilabi na kun nagabubo ang ulan sang pila ka oras.
Suno kay Latuna, gamay ang tamburong nga ginbutang sa ginahuman nga esplanade sa area sang Barangay Desamparados, Jaro, rason nga mahinay man ang pag-ilig sang tubig halin sa ila nga lugar.
Ginpahayag man ni Latuna nga tuman sila nga naapektohan sa pagtaas sang tubig baha bangud sa madasig nga pagataas sang lebel sini kun tig-uluan.
Naghingyo naman ang natungdan nga temporaryo anay buho-an ang porsyon sang esplanade agud nga makailig ang tubig sang tayuyon.
