𝗚𝗨𝗜𝗕𝗢𝗡𝗚𝗔𝗡, 𝗠𝗜𝗔𝗚𝗔𝗢 — Nagapati ang pila ka mga residente sang Barangay Guibongan, Miag-ao, Iloilo, nga mahina ang pagpatukod sang Department of Public Works and Highways (DPWH) Region 6 sang seawall sa ila lugar.
Ini kasunod man sang pagrumpag sang proyekto bangud sa mabaskog nga balod nga tuga sang hangin-habagat ukon Southwest Moonson.
Sa interview sang Bombo Radyo kay Nancy Revera, residente kag 58 ka tuig nga naga-istar sa lugar, iya ginpahayag nga 1980’s pa lang, masami na nga problema sang ila barangay amo ang balod nga nagasulod sa ila nga mga puluy-an.
Suno kay Revera, anay na nga ginbutangan sang KALAHI-CIDSS (Kapit-Bisig Laban sa Kahirapan-Comprehensive and Integrated Delivery of Social Services) sang seawall ang ila lugar, apang bangud man sa balod naguba ini.
Bangud diri, liwat nga ginpatukuran sang Department of Public Works and Highways sang seawall ang amo nga lugar.
Ginpahayag man sini nga sa pagdalagan sang panahon, naga-amat-amat man palapit ang coastal line sa ila nga mga panimalay.
Nagapati man ang natungdan nga mahina ang pundasyon sang seawall kag hapaw lamang ang semento nga gingamit, rason nga madasig ini nga naguba.
