PAVIA, ILOILO – Naga-agunto sa tuman ka higko nga tubig nga gina-supply sang BP Waterworks, Inc. ang mga residente sang Deca Homes sa Pavia, Iloilo.
Sa interview sang Bombo Radyo sa tagreklamo nga nagpahinago lang sa pangalan nga Jing, iya ginpahayag nga natubu-an na siya sang arikis bangud sa tuman ka lubog kag tuman ka baho nga tubig nga naggaguwa sa ila gripo.
Suno kay Jing, sa masobra tatlo ka tuig niya nga pag-istar sa nasambit nga subdivision, sang Pebrero 2020 lang nag-umpisa ang nasambit nga problema.
Ginpahayag ni Jing nga makapila na sila ka bes nga nagpalab-ot sang reklamo apang tubtub subong, wala pa sa gihapon nasolusyunan kag ginapanindugan pa sang BP Waterworks, Inc. nga potable water ang ila gina-supply.
Nagatin-aw lamang ang supply sang tubig suno sa tagreklamo sa tion nga may patigayunon nga water quality test.
Nauna na nga ginpahayag ni Mayor Luigi Gorriceta nga makapila na niya ka bes nga ginapatawag ang mga personnel sa nasambit nga water distributor apang wala gid nagapakita sa iya.
