MANSAYA LAPUZ– Hugot ang ginahimo nga pagpanghanda sang mga pumuluyo sang Brgy. Mansaya, Lapuz, Iloilo City sa pagbalik sang ginapahayag aswang nga naga-atake sa ila barangay.
Matandaan nga sang tinalikdan nga mga inadlaw, ginapahayag nga nag-atake sa nasambit nga barangay ang aswang kag luyag niya nga kuhaon ang lima ka bulan nga lapsag.
Sa interview sang Bombo Radyo kay Jenny Baldonado, iloy sang lima ka bulan nga lapsag, iya ginpahayag nga halos kada gab-i, indi sila makatulog bangud sa nasambit nga hitabo.
Suno kay Baldonado, nakita niya ang maitom nga kamot, may balahibo, malaba ang kuko, madasig maghulag kag ginapahayag nga mag-asawa ang aswang nga naga-atake sa ila lugar.
Ginguba man sang aswang suno kay Baldonado ang dingding sang ila balay kag bangud sini, ginbangkaw sang isa niya ka bata ang aswang.
Ginpahayag naman ni Joseph nga nagupi ang atop sang ila balay bangud sa paglumpat sang aswang.
Suno kay Joseph, ginahandaan na nila ang bangkaw, manunggal, ahos, asin kag iban pa nga panaming.
Ginpahayag man ni Joseph nga indi na sila magtulog agud makasigurado nga indi na makatuga sang istorbo sa ila barangay ang aswang.
