Nagpa-Bombo ang isa ka pumuluyo sang Brgy. San Juan, Molo, Iloilo City bangud sa ginaalegar ginapabuyan-buyanan sang ila punong barangay nga pirmahan ang dokumento nga insigida nila nga kinahanglan.
Sa interview sang Bombo Radyo kay Judilyn Ortiz, nagpa-Bombo, iya ginpahayag nga nag-process sila sang dokumento agud nga makapyansa ang iya himata kon sa diin, nagakinahanglan ini sang pirma sang ila punong barangay.
Kahapon nga adlaw sang nagpadulong sila sa barangay hall agud nga magpapirma sang dokumento.
Ginkatingala man sini ang kadugayon sang pagbalik ni Punong Barangay Jose Martin Maloto kasunod sang paglisensya sini nga makuha sang ballpen.
Nagkadto naman si Ortiz sa balay sang opisyal kon sa diin, nakit-an sini ang secretary sang barangay nga nauyatan ang dokumento kag nagpahayag nga sa barangay hall na lang pirmahan.
Naabtan naman sang natungdan si Punong Barangay Jose Martin Maloto nga nagapanilhig kag wala man sang iban nga ginaubra.
Didto na kag nagbaylohanay sila sang indi manami nga tinaga tubtob wala nasayran ang transakyon.
Natigayon naman nga napirmahan ni Maloto ang dokumento apang alas-9 na sa masunod nga adlaw kon sa diin nagtuga sang delay, rason man nga wala nakapyansa ang himata sang nagpa-Bombo.
Gin-athag man sini nga wala sang kahilabtanan ang kaso sang iya himata sa amo nga sitwasyon.
Nagpaathag naman si Punong Barangay Jose Martin Maloto nga wala siya naghambal nga indi siya magpirma sa dokumento nga ginapangayo ni Judilyn Ortiz para sa iya himata.
Suno kay Punong Barangay Jose Martin Maloto, iya ginpahayag nga indi opisina ang ila barangay agud nga magpirma sang ila dokumento.
Gin-athag man sini nga natabuan man nga may bisita siya sang naglisensya nga magkuha sang ballpen sa ila puluy-an.
Apang, gilayon nga nagpadulong si Ortiz kag nagwaldati kon sa diin, para sa iya, indi maayo nga akto.
Suno kay Maloto, dapat ibutang sa insakto nga pamaagi ang pagpapirma sang kinahanglanon nga dokumento.
Para sa natungdan, isa ka pangbastos sa ila puluy-an kag sa iya bilang opisyal ang ginhimo ni Ortiz.
