Ginkasubo sang pila ka residente sang Sooc, Arevalo, Iloilo City ang asud-asud nga pagluntad sang insidente sa Sunset Boulevard.
Sa interview sang Bombo Radyo kay Wilson Hernandez, iya ginpahayag nga sa pagsulod pa lang sang 2025, may mga nagakadisgrasya na nga motorista sa lugar.
Suno kay Hernandez, sang ginatukod pa lang ang Sunset Boulevard, naglaum na sila nga mabutangan sang mga early warning devices ukon mga signages.
Ginpahayag man sini ang masubo, mismo kabarangay nila ang nagtaliwan bangud sa kakulangan sang mga signages sa lugar.
Ginlaragway man sang natungdan nga mas dako pa ang mga tarpaulin sang mga pulitiko kon ikumpara sa mga signages sa Sunset Boulevard.
Nagpalab-ot man ini sa city government sang iya hingyo nga butangan na sang mga road signage agud indi na maliwat ang insidente kag mapabilin nga safe ang mga motorista lakip na ang mga turista kag residente.
Una na nga nagpahayag ang Iloilo City Government nga magpahamtang sang temporary nga mga traffic signs sa Sunset Boulevard.
Sa pihak sini, nagpanugyan man ang Iloilo City Traffic and Transportation Management Office sa mga motorista nga maghalong sa pagmaneho kag magbahar agud malikawan ang mga aksidente sa dalanon.
