Nagnubo ang average nga residential electricity rate sang MORE Electric and Power Corporation.
Sa interview sang Bombo Radyo kay Engineer Joe-Mel Zaporteza, Chief Operating Officer sang MORE Power, iya ginpahayag nga nagnubo sa P11.1354 kada kilowatt-hour ang average nga residential electricity rate, mas manubo sangsa P12.0344 kada kilowatt-hour sang nagligad nga bulan, nga nagapakita sang P0.8990 kilowatt-hour nga pagnubo.
Suno kay Zaporteza, ang mas manubo nga bili sang kuryente bangud sa lower generation and transmission cost, nga may pagnubo sang presyo gikan sa Wholesale Electricity Spot Market (WESM) kag stable nga presyo gikan sa bilateral contracts.
Ginpahayag man sini nga gin-gamit sang MORE Power ang paborable nga presyo gikan sa merkado sang kuryente paagi sa pagbakal sang dugang pa kon manubo ang presyo sang WESM.
Ang distribution sang MORE Power nagapabilin nga pareho.
Nagpaathag man ang korporasyon nga ang pagtaas ukon pagnubo sang balayran nagadepende sa bili sang kuryente para sa lebel sang konsumo kag sa kabug-usan nga kuryente nga ginkonsumo.
