ILOILO CITY- Nagpasar sang resolution ang Sangguniang Panlalawigan sang Iloilo agud mag-apelar kay Presidente Rodrigo Duterte kag sa Department of Agriculture nga i-recall ang Sugar Order Number 3 sang Sugar Regulatory Administration (SRA).
Ini nga order nga gin-release sang Pebrero 4 ang nagapahanugot sang importation sang 200,000 metric tons sang standard kag bottler’s grade refined sugar sa katuyuan nga ma-stabilize ang rising cost sang kalamay kag ginalauman nga low productivity sa sugar-producing areas nga apektado sang bagyo Odette.
Sa interview sang Bombo Radyo kay 3rd District Board Member Matt Palabrica, iya ginpahayag nga ang resolusyon nagatuyo nga punggan ang mangin dako nga kahalitan nga madala sang amo nga order sa mga sugarcane farmers kag local millers.
Suno kay Palabrica,sang nagligad nga mga adlaw, nagnubo na ang presyo sang kalamay kag amat-amat na nga nagapamierdehan ang mga mills kag sugar groups bilang resulta sang importasyon sang kalamay.
Pahayag ni Palabrica, kwestyonable man ang pag-import sang kalamay bangud nga yara pa subong sa peak season ang sugar production kag bastante pa ang suplay.
Dugang niya, ang mga magagmay nga mangunguma ang halos indi na makabutwa bangud sa high cost sang farm inputs partikular na ang abono kag gatong kag mas madugangan pa ang ila pag-antos bangud sa pagsarurot sang sugar prices.
