Gin-file na sa Kamara ang isa ka resolution agud nga imbestigaran ang makaduluda nga pagdamo sang peke nga birth certificates kag Philippine passports nga gina-isyu sa foreigners.
Ang nagduso sa House Resolution 1802 amo si Lanao del Sur Rep. Ziaur Adiong kun sa diin nakasaad nga dapat magpatigayon sang inquiry “in aid of legislation” ang House Committee on Local Government kag House Committee on Justice kasunod sang nabuyagyag sa Senado nga may malisyoso nga 308 birth certificates nga gingamit para sa passport application.
Magluwas pa ini sa Hulyo 11 nga report sang National Bureau of Investigation nga malapit 200 ka fictitious birth certificates ang na-isyu sa Chinese citizens paagi sa civil registry sang Sta. Cruz, Davao del Sur.
Suno kay Adiong, dapat nga insigida na nga ma-address ini nga isyu antes dalayon nga ma-exploit ang sistema sa Pilipinas kag agud nga mapabilin man ang integridad sang identification systems sang pungsod kag masigurado man ang national security.
Lakip sa ginalauman nga ma-cover sa imbestigasyon sang Kamara amo ang:
- Detalyado nga timeline sang mga hitabo nga naglab-ot sa pagbulgar nga may peke nga birth certificates kag passports
- Involvement sang Local Civil Registrars sa pag-isyu sang fake birth certificates
- Dugang nga mga tikang kag detalyado nga guidelines agud nga malikawan nga matabo pa ini liwat sa Philippine Statistics Authority, Local Civil Registrars kag sa iban nga government agencies kag corporations
Antes sini, matandaan nga ginduso man sa Senado ang kaangay man nga inquiry sa issuance sang peke nga birth certificates matapos nabuyagyag sa upper chamber nga si suspended Bamban, Tarlac mayor Alice Guo ang may gina-uyatan nga multiple birth certificate records nga may wala nagasalanto nga entries.
